100x100 Coiro

Exposición: 100 x 100 coiro

 

A Escola Municipal de Artes e Oficios de Vigo referente en España no traballo do coiro: 

A finais dos anos corenta do século pasado, se comeza a impartir aquí a especialidade de Repuxado en Metais e Coiro. Aquela tradición, continuada no tempo, segue a ter hoxe no  noso Obradoiro de Artesanía en Coiro, un lugar de conservación e innovación deste oficio.

Amósanse neste exposición traballos realizados, con distintas técnicas, por destacados artesáns procedentes de Galicia, Castela, Catalunya, Madrid, Baleares, Andalucía e Madrid, e a participación, tamén, de tres artesáns de Portugal e Bulgaria.

 

Pasado, presente e futuro

O pasado. Andrea, Mercedes e Virginia, durante moitos anos mantiveron como mestras nesta Escola, o repuxado en coiro, facendo do noso Centro unha reserva desta técnica. Exhíbense pezas elaboradas por unha das primeiras alumnas desta Escola e por ferramentas e documentación dese momento inicial da formación.

O presente: exhíbense traballos de alumnado actual e xa egresado e pezas elaboradas por obradoiros artesáns  xurdidos da formación impartida no vello edificio de García Barbón que hoxe, co seu traballo profesional, danlle tamén proxección a esta, debedores como son da formación e conservación das técnicas impartidas pola Escola Municipal de Artes e Oficios viguesa.

O futuro está representado nesta mostra, no traballo de artesáns de primeira liña que, mesturando a tradición e a innovación, fan do coiro un oficio de mañá.  

Con esta exposición quérese facer partícipe ao público do labor de conservación, formación e innovación na especialidade de Artesanía en Coiro da xa centenaria Escola de Artes e Oficios de Vigo. Pretendemos que poida recoñecer o coiro como un material que serve máis alá que de soporte dun moedeiro ou dunha carteira: que o límite no traballo neste material está na imaxinación da persoa que o traballa, no agarimo co que o trata e o respecto á súa nobreza.

Finesse, delicadeza, ese era o consello que Al Stohlman lle daba a cada un dos seus aprendices. Delicadeza, agarimo, repecto, son as ferramentas que cada día centos de artesáns seguen empregando para que cada una das pezas que fan realidade conteña estes sentimentos. Así o sentimos cando o cortamos, o cosemos ou o transformamos con   calquera das técnicas do oficio.

Os antigos oficios do coiro mantéñense, transfórmanse ou se modernizan, pero a materia é a mesma e ofrécesenos con infinidade de posibilidades: o repuxado, o labrado, o estampado, o modelado, o trenzado… técnicas milenarias nas mans dos que hoxe as traballan e innovan.

Organiza: Escola Municipal de Artes e Oficios

Comisario: Pepe  Pereira (mestre do Obradoiro de Artesanía en Coiro da EMAO)